Lumapit sa Radyo Mo Nationwide si Mary Jane ng Pasay City upang isangguni ang tungkol sa kanyang salary deduction.

Ayon kay Mary Jane, nais nitong malaman kung totoo ngang isang buwan lamang ang dapat maging salary deduction ng mga domestic helper at hindi anim na buwan.

Kwento pa ni Mary Jane, sa pamamagitan ng kanyang kapit-bahay ay ipinakilala siya sa isang employer sa Singapore.

Ngunit dahil sa nahirapan ang employer na hanapan si Mary Jane ng panibagong amo, kaya’t napilitan na itong lumapit sa isang agency sa nasabing bansa.

Nakipag-ugnayan naman ang programang Radyo Mo Nationwide kay Philippine Overseas Employment Administration Deputy Administrator Stella Banawis at kinumpirma nitong hindi tama na katumbas ng anim na buwan ang kabayaran sa placement fee ng isang domestic helper.

Iginiit nito na nakasaad sa batas na hindi dapat ipataw sa mga manggagawa ang nasabing kabayaran.

Kasabay nito ay nanawagan si Banawis sa publiko na i-report ang mga ma-anomalyang recruiters na mananamantala sa ating mga kababayan para magawan nila ito ng aksyon.

Bunga nito ay pinayuhan na lamang ng POEA si Mary Joy na mas makakabuti kung umalis na lamang ito sa kanyang agency at huwag nang tumuloy sa Singapore kung mayroon itong pag-aalinlangan.

Pinayuhan rin ng palatuntunan si Mary Joy na pumunta mismo sa opisina ng POEA para mas matugunan ang kanyang hinaing.

Sa pamamagitan ni Kasamang Mel Coronel ng RMN General Santos ay lumapit ang pamilya ni Melly Umboy upang humingi ng saklolo kaugnay sa kalagayan ng kanyang anak na nasa Kuwait.

Ayon kay Mel, noong nakaraang buwan pa nila huling naka-usap si Ginalyn at humihingi na ito ng tulong para maka-uwi siya ng bansa

Nangangamba na rin ang ina ni Ginalyn na baka patay na ang anak ngunit umaasa pa rin silang makaka-uwi ito ng ligtas.

Nabatid rin na nagawa nang lumapit sa Department of Foreign Affairs (DFA) ng kanilang pamilya ngunit hindi rin nagawan ng aksyon.

Matatandaang naka-alis ng bansa si Ginalyn noong ika-17 ng Nobyembre taong 2010 ngunit nagmamaka-awa na itong umuwi ng Pilipinas dahil sa pagmamalupit ng kanyang amo.

Bunga nito ay nakapanayam naman ng programang Bantay OFW ang kapatid ni Ginalyn na si Lina Umboy at inilahad ang tunay na kalagayan ng kanyang kapatid.

Bilang pagtugon ng programang Bantay OFW ay nangako itong makikipag-ugnayan sa embahada maging sa kanyang employer at agency sa oras na makuha ng pamilya ang mga papeles na mayroong kaugnayan sa pagtatrabaho ni Ginalyn sa nasabing bansa.